"Co senumneis vus atgnamein?" vegnin nus dalla diaspora magari dumandai. En loghens catolics ein ins dil meini che la sclarida dil num sappi levgentar l'entelgientscha. En vesta dallas numerusas baselgias e cuminonzas evangelicas vegnin nus dumandai suenter la denominaziun exacta da nossa confessiun.
Prot. = protestant
La denominaziun protestanta dervia dalla secunda dieta a Speyer 1529. Sis cantuns e 14 marcaus han lu "protestau" encunter las decisiuns dalla maioritad catolica ella dieta digl imperi da scumandar il priedi evangelic aviert el reginavel. Quei protest ha purtau als evangelics il num "protestant".
Evang. = evangelic
Evangelic deriva dil plaid grec 'Euangelion'. Igl 'Euangelion' era en il temps hellenistic - roman ina denominaziun dil lungatg ufficial per ina declaraziun dalla regenza digl imperatur ni dil retg. Ella baselgia giuvna ei quella denominaziun vegnida transferida en il messadi da Jesus Christus. Da cheu d'envi manegia la denominaziun "evangelic" ina mesira: tenor il messadi da Jesu Christi. Ils reformaturs dil 16avel tschentaner levan danovamein dar valeta a quella mesira enten alzar il messadi dalla bibla e cunzun dils evangelis dil niev testament sin la norma obligonta dalla cardientscha e dalla baselgia. En quei senn ein ozildi tut las baselgias - emporta buca da tgei confessiun - evangelicas.
Ref. = reformau
"Reformau" munta: mess danovamein en fuorma. Ils reformaturs havevan buca l'intenziun da fundar ina nova baselgia, mobein da reformar la baselgia existenta. Quei che la baselgia dueva da siu temps puspei metter en fuorma era il plaid da Diu. Johannes Calvin: "La baselgia ei igl imperi da Christus; Christus denton regia sulettamein entras siu plaid." Huldrich Zwingli: "Tgeinina ei la baselgia da Christus? Quella che auda siu plaid." Reformadas ein nossas baselgias entras lur stenta da saver metter danovamein en fuorma lur cardientscha e lur agir entras tedlar sil plaid da Diu.
"Co senumneis vus atgnamein?" Pli impurtonta ch'il num e la denominaziun ei la damonda, tgi confessein nus e co vivin nus nossa confessiun?